श्री संत ज्ञानेश्वर महाराज ७५० वा जन्मोत्सव:आळंदीत भव्य हरिनाम सप्ताह आणि ज्ञानेश्वरी पारायण सोहळ्याची जय्यत तयारी

आळंदी – श्री संत ज्ञानेश्वर महाराजांच्या ७५० व्या जन्मोत्सवानिमित्त श्री क्षेत्र आळंदी देवाची येथे ३ मे ते १० मे २०२५ या कालावधीत अखंड हरिनाम सप्ताह आणि ग्रंथराज श्री ज्ञानेश्वरी पारायणाचा भव्य सोहळा आयोजित करण्यात येत आहे. या अध्यात्मिक महोत्सवाच्या नियोजनासाठी आळंदी संस्थानात ग्रामस्थांची संवाद बैठक आयोजित करण्यात आली होती. या बैठकीला मावळचे खासदार श्रीरंग आप्पा बारणे यांनी उपस्थिती दर्शवून सोहळ्यासाठी आवश्यक सुविधांबाबत विश्वस्तांशी सविस्तर चर्चा केली.

सोहळ्याची रूपरेषा
प्रमुख विश्वस्त योगी निरंजन नाथ यांनी सोहळ्याची सविस्तर माहिती सादर केली. या सोहळ्यात ग्रंथराज ज्ञानेश्वरी पारायणात सहभागी होणाऱ्या सर्व भाविकांना ज्ञानेश्वरीची प्रत मोफत प्रदान करण्यात येणार आहे. ३ मे ते १० मे या कालावधीत आयोजित कार्यक्रम खालीलप्रमाणे असतील:

सकाळी ६:०० ते १०:००: ग्रंथराज श्री ज्ञानेश्वरी पारायण

सकाळी १०:०० ते १२:००: कीर्तन

दुपारी १:३० ते ३:३०: चरित्र चिंतन
३ ते ५ मे: संत तुकाराम महाराज ३७५ वा वैकुंठ गमन सोहळा – चरित्र चिंतन

६ ते ८ मे: श्री संत ज्ञानेश्वर महाराज ७५० वा जन्मोत्सव – चरित्र चिंतन

९ मे: संत नामदेव महाराज ६७५ वा संजीवन समाधी सोहळा – चरित्र चिंतन

दुपारी ४:०० ते ५:००: प्रवचन

सायंकाळी ६:३० ते ८:३०: कीर्तन

१० मे (सकाळी १०:०० ते १२:००): काल्याचे कीर्तन

भाविकांसाठी सुविधांचे नियोजन-

सोहळ्याच्या यशस्वी आयोजनासाठी आवश्यक सुविधांवर बैठकीत सखोल चर्चा झाली. यामध्ये पिण्याच्या पाण्याची व्यवस्था, आरोग्य सुविधा, स्वच्छता, इंद्रायणी नदीच्या पाण्याचा वापर, बाहेरून येणाऱ्या भाविकांसाठी निवास व्यवस्था आणि भोजन व्यवस्था यांचा समावेश आहे. या सर्व बाबींचे नियोजन व्यवस्थित व्हावे यासाठी पुढील दोन दिवसांत १३ समित्यांची स्थापना करण्यात येणार आहे. या समित्या विविध जबाबदाऱ्या सांभाळून सोहळा निर्विघ्नपणे पार पडेल याची खबरदारी घेतील.

दरम्यान, या संवाद बैठकीला संस्थान कमिटीचे विश्वस्त अँड. राजेंद्र उमाप, विश्वस्त डॉ. भावार्थ देखणे, व्यवस्थापक ज्ञानेश्वर वीर, माजी नगराध्यक्ष बबनराव कुऱ्हाडे, नंदकुमार कुऱ्हाडे, प्रकाश कुऱ्हाडे, विलास घुंडरे, डी. डी. भोसले, लोंढे महाराज, शेवाळे महाराज, राहुल चीताळकर, सागर भोसले, अनिकेत कुऱ्हाडे, प्रशांत कुऱ्हाडे, संतोष भोसले, योगिराज कुऱ्हाडे, पांडुरंग वरखडे, अजित वडगांवकर, विष्णू वाघमारे, रोहन कुऱ्हाडे, महेश कुऱ्हाडे, अमित घुंडरे, राहुल चव्हाण, ज्ञानेश्वर जालिंदर कुऱ्हाडे, सतीश कुऱ्हाडे, प्रसाद बोराटे, किरण येळवंडे, सौरभ गव्हाणे, रमेश गोगावले आणि इतर अनेक ग्रामस्थांनी सहभाग घेतला. या सर्वांनी मिळून सोहळ्याच्या यशस्वितेसाठी एकजुटीने प्रयत्न करण्याचा संकल्प केला.

अध्यात्मिक आणि सांस्कृतिक उत्सव –

हा सोहळा केवळ आळंदीकरांसाठीच नव्हे, तर राज्यभरातून आणि देशभरातून येणाऱ्या भाविकांसाठी एक अध्यात्मिक आणि सांस्कृतिक उत्सव ठरणार आहे. श्री संत ज्ञानेश्वर महाराज, संत तुकाराम महाराज आणि संत नामदेव महाराज यांच्या चरित्र चिंतनामुळे भाविकांना त्यांच्या कार्याचा आणि विचारांचा परिचय होईल. तसेच, कीर्तन, प्रवचन आणि ज्ञानेश्वरी पारायण यामुळे आळंदी अध्यात्मिक उर्जेने न्हाऊन निघेल. या सोहळ्याच्या यशस्वितेसाठी आळंदी ग्रामस्थ आणि संस्थान पूर्णपणे सज्ज असून, हा महोत्सव भाविकांसाठी अविस्मरणीय अनुभव ठरणार आहे.