आळंदी वार्ता : तीर्थक्षेत्र आळंदीच्या विकासाला गती देत येत्या नगरपरिषद निवडणुकीत भारतीय जनता पक्षाची (भाजपा) सत्ता आणण्याचा निर्धार माजी नगराध्यक्षा आणि भाजपा आळंदी शहर मंडळाच्या नवनियुक्त अध्यक्षा वैजयंता उमरगेकर यांनी व्यक्त केला. भाजपा कार्यकर्त्यांना झटून कामाला लागण्याचे आवाहन करताना त्यांनी सर्व संबंधित घटक, पदाधिकारी, वारकरी आणि भाविकांना विश्वासात घेऊन पक्षाचे ध्येय साध्य करण्याचे आश्वासन दिले. वैजयंता उमरगेकर यांची भाजपा प्रदेशाध्यक्ष चंद्रशेखर बावनकुळे यांनी आळंदी शहर मंडळ अध्यक्षपदी नियुक्ती केली असून, या निवडीचे पंचक्रोशीत जोरदार स्वागत झाले आहे.
सत्कार सोहळा:
वैजयंता उमरगेकर यांच्या नियुक्तीनिमित्त हॉटेल अशोक येथील सभागृहात भाजपा आळंदी शहर मंडळ, आजी-माजी पदाधिकारी, पक्षाच्या विविध शाखांचे प्रतिनिधी आणि निष्ठावान कार्यकर्त्यांच्या उपस्थितीत भव्य सत्कार सोहळा पार पडला. यावेळी माजी उपनगराध्यक्ष सचिन गिलबिले, प्रशांत कुऱ्हाडे, माजी नगरसेवक अशोक उमरगेकर, हनुमंत तापकीर, उज्जवला पेठकर, संकेत वाघमारे, मंगलाताई हुंडारे, संगीता फपाळ, शेतकरी बचाव आंदोलनाचे उपाध्यक्ष बाळासाहेब पेटकर, उद्योजक बाळासाहेब वडगावकर, बंडूनाना काळे, माजी नगरसेविका सुनीता रंधवे, मंडूबाबा पालवे, कृष्णा पालवे, संजय घुंडरे पाटील, सुजित काशीद, वासुदेव तुर्की आदी उपस्थित होते. आळंदी जनहित फाउंडेशनचे कार्याध्यक्ष अर्जुन मेदनकर यांनीही शुभेच्छा दिल्या.
वैजयंता उमरगेकर यांचे मनोगत:
वैजयंता उमरगेकर यांनी पक्षाने दिलेली जबाबदारी प्रामाणिकपणे आणि यशस्वीपणे पार पाडण्याचा विश्वास व्यक्त केला. त्या म्हणाल्या, “आळंदी नगरपरिषदेच्या निवडणुकीत भाजपाची सत्ता आणण्यासाठी सर्व नागरिक, वारकरी, भाविक आणि संस्थाचालकांना विश्वासात घेऊन पक्षाचा विश्वास सार्थ ठरवण्यासाठी प्रयत्न करेन.” त्यांनी कार्यकर्त्यांना पक्षसंघटना बळकट करण्यासाठी एकजुटीने काम करण्याचे आवाहन केले.
अशोक उमरगेकर यांचे विचार:
माजी नगरसेवक अशोक उमरगेकर यांनी वैजयंता उमरगेकर यांच्या नगराध्यक्षपदाच्या कार्यकाळात आळंदीच्या भरीव विकासाचे कौतुक केले. ते म्हणाले, “पक्षाने अनेक इच्छुकांमधून वैजयंता यांना ही जबाबदारी देऊन त्यांच्या कार्याचा सन्मान केला आहे. सध्या आळंदी नगरपरिषदेत प्रतिनिधी नसल्याने पिण्याच्या पाण्याचे वितरण, कचरा व्यवस्थापन, ड्रेनेज यांसारख्या नागरी समस्यांनी डोके वर काढले आहे. येत्या निवडणुकीत पक्ष कार्यकर्त्यांना विश्वासात घेऊन विविध समित्या, महामंडळे आणि विशेष कार्यकारी अधिकारी यांच्या नियुक्तीत न्याय दिला जाईल.” त्यांनी पक्षाशी एकनिष्ठ राहण्याचा सल्लाही दिला.
नागरी समस्यांवर लक्ष:
संजय घुंडरे पाटील यांनी पिण्याच्या पाण्याच्या समस्येला प्राधान्य देण्यासाठी पाठपुरावा सुरू असल्याचे सांगितले. तसेच, वारकरी शिक्षण संस्थांमधील विद्यार्थ्यांवरील अनैसर्गिक अत्याचाराच्या घटनांबाबत तीव्र नाराजी व्यक्त करत अशा संस्थांना पाठीशी घालणार नसल्याचे स्पष्ट केले. “आळंदीचे नाव बदनाम करणाऱ्या घटनांना समर्थन मिळणार नाही,” असे त्यांनी ठणकावले.
दरम्यान, सत्कार सोहळ्यात उपस्थित मान्यवरांनी वैजयंता उमरगेकर यांचा सन्मान केला. संकेत वाघमारे यांनी सूत्रसंचालन केले. या निवडीमुळे आळंदी नगरपरिषदेच्या आगामी निवडणुकीत भाजपाला बळ मिळण्याची शक्यता आहे.
