आळंदीच्या मंदिरात पुन्हा गैरप्रकार: महिला भाविकाची छेडछाड, विकृत पोलिसांच्या ताब्यात
आळंदी: संत ज्ञानेश्वर महाराज समाधी मंदिरात बुधवारी सकाळी नऊच्या सुमारास एका महिला भाविकाची छेडछाड झाल्याची धक्कादायक घटना घडली. सिद्धेश्वर दर्शनासाठी रांगेत थांबलेल्या परगावच्या या महिलेचा एका विकृत व्यक्तीने रांगेचा गैरफायदा घेत छेड काढली. महिलेच्या आरडाओरडामुळे मंदिर कर्मचारी आणि नागरिकांनी संशयिताला पकडून पोलिसांच्या ताब्यात दिले. आळंदी पोलिस या प्रकरणाचा अधिक तपास करत आहेत.
ही घटना मंदिरातील सुरक्षाव्यवस्थेवर प्रश्नचिन्ह उपस्थित करणारी आहे. गेल्या महिन्याभरात मंदिरात अनेक गैरप्रकार घडले आहेत. एका पुजाऱ्याने समाधीवरील पैसे चोरल्याची घटना, मद्यधुंद कर्मचाऱ्याने रात्री गोंधळ घातल्याचा प्रकार आणि कीर्तनाच्या वादातून एका महाराजाने कर्मचाऱ्याला धक्काबुक्की केल्याची घटना ताजी आहे. आता या छेडछाडीच्या प्रकरणाने मंदिरातील असुरक्षित वातावरण पुन्हा अधोरेखित झाले आहे.
मंदिर कर्मचारी तुकाराम माने, शशिकांत राजेजाधव आणि नागरिकांनी संशयिताला भक्ती सोपान पुलाजवळ पकडले. मंदिर व्यवस्थापक ज्ञानेश्वर वीर यांनी सांगितले, “हा गैरप्रकार सकाळी नऊच्या दरम्यान घडला. संशयिताला पोलिसांच्या ताब्यात दिले आहे. मंदिरातील सुरक्षाव्यवस्था अधिक मजबूत करण्यासाठी पावले उचलली जातील.”
मंदिरात सीसीटीव्ही, खासगी सुरक्षा कर्मचारी आणि पोलिस उपस्थित असूनही अशा घटना घडत असल्याने भाविकांमध्ये नाराजी पसरली आहे. मंदिर प्रशासनाने सुरक्षाव्यवस्थेत तातडीने सुधारणा करण्याची मागणी जोर धरू लागली आहे.
